A ponte vella

Cando falamos da chamada "Feira Franca", estamos a falar dunha recreación da época medieval en Pontevedra e dunha celebración certamente recente, digo isto porque este ano imos pola oitava edición, son poucos anos polo de agora, pero os pontevedreses e pontevedresas acollimos este evento con grande entusiasmo e agarimo, e hoxendia pasa por ser unha das actividades que máis xente concentra nos actos lúdicos do verán pontevedrés, desenrólase nas rúas e prazas do noso casco histórico no primeiro fin de semana do mes de Setembro,- este ano concretamente os dias 31 de Agosto e 1 de Setembro -, rematadas as festas da Peregrina e como colofón final ao verán, e sempre concentra a grande cantidade de persoas, tanto de Pontevedra e arredores coma turistas de Galiza e Portugal, lémbrome o primeiro ano que se celebrou, eu achegárame cós meus pais ata a praza da Ferreria e xa daquela habia un número importante de persoas vestidas de época e implicadas en levar cara adiante unha festa que daba os seus primeiros pasos, sorprendeume de verdade e puiden comprobar que aquelo seria o preludio do éxito que ano tras ano achega á nosa cidade a moitos visitantes, e que pasa tamén por ser unha inxección económica importante para o comercio pontevedrés.

A Feira Franca baséase no privilexio outorgado polo rei Henrique IV no ano 1467, polo cal podíase celebrar na nosa cidade unha feira libre de taxas ao longo dun mes, concretamente quince dias antes e quince dias despois da festividade de San Bartolomeu, o 24 de Agosto, a celebración deste mercado coincidiu cun periodo de puxanza económica daquela na nosa cidade, a pesca e mailo comercio foran os piares dese desenvolvemento económico, convertendo á cidade do Lérez na vila máis densamente povoada de toda Galiza, a construcción da Basílica de Santa Maria "A Maior" por parte do Gremio de Mareantes, - unha confraria de mariñeiros cunha importancia sobranceira na Pontevedra da Idade Média- pasa por se-la manifestación artística máis importante daquela época. Cada ano, e dende hai oito xa, a feira adícase a un determinado ou destacado aspecto da nosa história, este ano o elexido foi "Pontevedra e o mar", o ano pasado foran "Os Irmandiños", a feira comeza cun pregón o primeiro venres do mes de Setembro dende a balconada da casa da Luz, na praza da Verdura e dura todo o fin de semana, as rúas e prazas do noso casco vello engalánanse con bandeiróns, estandartes, teas e bandeiras, e a xente vai vestida e caracterizada como antaño, hai diversidade de postos coa gastronomia galega, onde poderedes desfrutar de viños, empanadas, chourizos, pan de millo ou todo tipo de postres caseiros, e tamén postos de artesania na Praza da Ferreria, ademais hai numerosas actividades tales como cetreria, tiro con arco, saltimbanquis, oficios antigos e demais, todo desenrólase no casco histórico da nosa cidade e como tal transfórmase durante estes dias transladando ao visitante ou o participante á Idade Média.

Dende aqui, quérovos animar a todos e todas a que veñades a Pontevedra estes dias, a que visitedes a nosa cidade e o noso casco histórico, a que desfrutedes de Pontevedra coma nós desfrutamos estes dias, a que comades e bebades, escoitedes aos trovadores, desfrutedes có torneo medieval, vexades o traslado a cabalo do viño polo "Vello camiño de Castela" ou a execución pública dalgún vilano, a que, en definitiva, vos vistades e vos confundades có resto dos participantes desta festa, en fin, que rematede-lo verán con esta grande traca final que é a "Feira Franca" de Pontevedra, unha actividade que non vos podedes perder, asegurovos que repetiredes.

De tódalas maneiras, se todo isto que vos digo non foi dabondo para convencervos a vir, sempre podedes atopar máis información dos actos da Feira Franca na súa web oficial ou botarlle unha ollada a este pequeno video da edición do ano 2006.

chuzame

Trackback This Post | Subscribete aos comentarios via RSS Feed