Este domingo ás 20:00 e no estadio de Santo Domingo en Alcorcón, o Pontevedra pode dar un paso máis cara o arelado ascenso á liga profesional, miles de siareiros granates estaremos tras deles, animando e dándolles todo o noso apoio.

E como ben reza unha faixa que adoitan poñer perto da Pallota, detrás da bancada de norte, estamos fartos xa desta Segunda B, o noso sitio está máis arriba.

¡¡ Forza Ponte !!

O Pontevedra Clube de fútbol contra vento e marea venceu no estadio do Oviedo, non foron 30.000 afeccionados como prometian no inferno do Tartiere, se cadra uns cantos miles menos pero ruidosos, cun árbitro tendencioso e caseiro, con dous expulsados, con carreiras e porrazos á saída do encontro, inda así, con todo en contra, a marea granate estivo presente en terras astures e presenciou a vitória dos granates e a exhibición dun impresionante Igor de Souza.

O primeiro gol:

E o segundo, grandísimo Igor de Souza.

Agora a polo Alcorcón, as entradas á venda dende hoxe nas oficiñas do clube ao prezo da anterior eliminatoria.
¡¡ Hai que encher Pasarón o domingo, todos de granate !!

Poderia perfectamente se-lo titulo dunha película con trasfondo histórico e chea de extras, unha desas ás que son afeccionado, tamén poderia se-lo Bloody Sunday irlandés, quén sabe, pero este sábado a cidade de Pontevedra, polo que semella vai estar invadida polas hordas astures, por obra e gracia dos dirixentes do Pontevedra Clube de fútbol, nomeadamente os señores Nino Mirón e Fran Crujeiras.

¿Por que digo isto? pois basicamente porque non me parece de recibo, e xa van unhas cantas ocasións nas que se fai tal despropósito, que a afección rival saia beneficiada nos partidos que xogamos na casa, en canto a ubicación e horarios sobre todo, non entendo como se lles pode permitir que finalmente se fagan con ao redor de 4.000 entradas e ademais lles poñamos o partido un sábado pola tarde, cando aqui señores dirixentes, vostedes fixeron unha enquisa e resultou que tódolos socios e siareiros granates queremos o fútbol o domingo pola tarde ás cinco do serán. Como pode ser que as entradas se poñan á venda ás 12 da mañá do mércores, cando dende o domingo estamos clasificados, como pode ser que a presa e a última hora estexan encofrando con formigón o que vai ser unha bancada de preferencia ateigada de xente, como pode ser que esa bancada sexa inaugurada polos afeccionados foráneos na súa mellor ubicación, os asturianos arriba, ollando de puta madre o partido e os socios granates abaixo, soportando estoicamente o que lles poida vir darriba e ademais cós banquillos diante, limitando a visibilidade.

O mércores a última hora, cando me pasei polas dependencias administrativas do clube a recolle-lo meu suplemento de socio de Norte, unha empregada do mesmo, nomeadamente a reponsábel de relación có socio, comentábame, iso si, en perfecto galego, cousa que non deixou de sorprenderme, que a ubicación da hinchada ovetense fora imposta polo Comité de seguridade, que eles non podian facer nada, por favor, parénse un intre a pensar, ¿de verdade a algún responsábel policial se lle ocorre xuntar nunha mesma bancada a dúas afeccións rivais?, a calquiera persoa no seu sano xuizo non, ademais, non hai que ter demasiado coñecemento dos siareiros ovetenseses para saber que entre as súas peñas está symmachiarii, unha peña ultra que tamén se desprazará ata a nosa cidade, ¿terán xa unha ubicación para estes xente?

Agora o que importa é facer un bo partido e pasar á seguinte eliminatoria, logo haberá que pedirlle contas a estes dirixentes de pacotilla que dirixen o noso clube.

Cecais un Barcelona-Manchester United poderia se-la final da Champions League deste ano, eu agardo que si, un enfrontamento directo entre dous dos máximos goleadores europeos e nun dos mellores escenários para facelo, o Santiago Bernabeu de Madrid. Leo Messi e Wayne Rooney xunto con Drogba son agora mesmo os máximos artilleiros europeos, todo un luxo para o calqueira afeccionado ao bo fútbol, e eu como siareiro incondicional do fútbol inglés agardo este choque con grande impaciencia, agora que tampouco están nin Real Madrid nin Chelsea para completa-lo que serian uns magníficos cuartos de final.

 Andrés, que teñas sorte, pero eu confio no bo facer do United, xa veremos quén é o mellor ao final dos 90 minutos..

O Pontevedra clube de fútbol enceta o final da tempada 09-10 cunha nova campaña enmarcada dentro do famoso slogan do Optimismo crónico, agora que acadamos uns cantos resultados positivos, e que xa semella que podemos tocar coa punta dos dedos o cuarto posto que danos dereito a desputa-lo play-off de ascenso, saen uns abonos para enganchar a Pasarón a aqueles afeccionados dubitativos có xogo dos granates, por desgraza, e non é cousa do noso clube senón de moitos, sempre hai afeccionados que se suben ao carro cando chegan as victorias, non como outros que estamos alí chova ou faga sol, xoguemos o play-off ou deamos lástima como nalgúns partidos dos cales prefiro non comentar nada, e nesta tempada tivemos uns cantos e contra equipos galegos, pero vamos, case mellor perder de paliza cun paisano que cun de fóra.

Pois nada, como aqui estamos para botar sempre unha man ao noso equipo, meto esta publicidade de balde da campaña dos derradeiros cinco partidos desta tempada, a ver se máis xente se achega por Pasarón, que todos serán benvidos, tamén os que se apunten a última hora, non lles miraremos mal, que estén tranquilos, que aqui todos remamos no mesmo sentido, e ogallá poida levar á cativa a un partido da fase, coa súa bufandiña e a súa camisola granate.

O que xa non entendo moi ben é se quixeron dicir choque ás cinco (horario cotián dos partido) ou choque ás cinco (veña esa man home !!), porque neste último caso non levaria til o as, nese caso aqui se ofrece un servidor para botar unha  man coas campañas en galego, cousa que por outra parte aplaudo.

Volta Igor de Souza, o noso dianteiro brasileño, un dos mellores que tivemos na historia recente do Pontevedra C.F., agardemos que traia unha chea de goles no peto, porque os imos precisar e moito para entrar como cuartos clasificados e acceder este ano á fase de ascenso, que se me antolla máis dificil ca nunca, pero inda asi temos esperanza.

Por certo, na foto está acompañado polo presidente Nino Mirón e polo propietario de Supermercados Moldes (supoño), pois nunca ollei ningunha foto súa, pero o fondo da imaxe coas latas de atún Pescamar, os packs de Estrella Galicia e demais delatan que están nun supermercado.

Contra vento e marea, e sobre todo fronte á actitude institucional, que foi quén de desligarse totalmente deste acto deportivo á par que reivindicativo por primeira vez nos últimos catro anos, a xente de Siareiros Galegos ven de ultima-los detalles para celebrar un novo xogo da nosa selección absoluta de fútbol, desta volta mermada de maneira moi importante debido ao nulo apoio da Xunta de Galiza e da Federación Galega de Fútbol, que fixeron gala dunha actitude totalmente antigalega e mesetaria, porque si houbo cartos para ceder o estadio de Riazor e recibir a la roja, pero non para apoiar ao deporte galego e organizar un partido destas características que, inda que non tendo caracter oficial, si fai moito ben ao noso deporte e conciencia ás futuras xeracións de rapaces e rapazas, que son a canteira do deporte galego.

O dito, aqui téde-lo cartaz cós actos a celebrar o vindeiro sábado dia 26 do presente, a partires das cinco do serán en Santiago de Compostela, o encontro terá lugar no campo de Santa Isabel, previo a el haberá a tradicional manifestación reclamando o noso dereito a competir baixo a nosa bandeira e logo do partido o concerto de tódolos anos.

Dende aqui facemos un chamamento á participación de toda a povoación galega nos diversos actos organizados para o sábado, fronte a deixadez e o ninguneo do noso governo, nós sairemos á rúa a defende-lo noso dereito como galegos e galegas a ter as nosas propias seleccións deportivas.

Moitos de vós supoño que non saberedes quén é Goran Maric e moito menos coñeceredes o escudo dabaixo, pertencente ao Norwich City, alcumados os canarios, equipo que milita na Football League Championship, que ven sendo a segunda división inglesa, tamén chamada Coca-Cola League, non fai falla explicacións ao respecto supoño, aqui tedes a nova saida na web de deportes da BBC.

Serbian striker Goran Maric leaves Norwich City

Norwich have confirmed that Serbian striker Goran Maric has left Carrow Road by mutual consent. The 25-year-old former Celta Vigo and Barcelona forward signed a one-year deal with the Canaries in the summer after impressing on trial. But he has made just one start and one substitute appearance this season. Manager Paul Lambert told the club's website: "It's in Goran's best interests to move on and try to progress his career elsewhere."

Como dicia, Goran Maric está libre, ao meu parecer e ao de moitos granates, poderia ser un fantástico reforzo para a tan necesitada dianteira do Pontevedra C.F. e que poderia chegar no mercado invernal, hai tres ou catro dias que foi declarado transferible polo seu anterior equipo e agora está máis libre que un paxariño, polo tanto dende aqui, e con toda a humildade que me caracteriza, insto ao clube a facer (de novo) un pequeno esforzo e a traer a este dianteiro Serbio que militou no Barcelona B e no Celta de Vigo B, no que meteu unha chea de goles, despois do visto no partido de onte en Pasarón, e en moitos desta tempada, ben poderiamos darlle matarile a Iban Espadas e a Matias Saad e facernos cós servizos de Goran Maric, coido que seria unha magnífica fichaxe, non sei que opinará disto Pablo Alfaro.

Nos vindeiros dias saberemos algo máis, o clube polo de agora non dixo nada, pero nos foros hai dias que hai un ruxe-ruxe sobre o tema.

Nos anos que levo de socio da bancada de norte de Pasarón nunca ollara tal cousa, non sei cal seria o peor partido na casa en moitos anos, se o do pasado domingo fronte a un recén ascendido (de rebote) da terceira división, que ten tódolo meu respecto e admiración por ter unha chea de galegos e canteiráns nas súas ringleiras,  ou se o 0-5 do Lugo na casa que tanto dano nos fixo aos socios e afeccionados granates. O feito é que Roberto Aguirre, o chamado a ascendernos esta tempada, ou alomenos a levarnos ao play-off de ascenso, foi cesado no dia de onte, agora ábrese unha vez máis o mercadeo e na terna de futuribles, que eu coñeza, polo de agora hai dous firmes candidatos, o ex capitán do Sevilla Pablo Alfaro, e o noso veciño e coñecido por todos, Fernando Castro Santos, nécora para os amigos. 

A cuestión é que, na miña modesta opinión, este ano contamos cunha plantilla con unha calidade bastante aceptable, non somos a ONU de outros anos, e coido que as fichaxes fixéronse con cabeza, exceptuando a de Matias Saad, que non da o nivel nin para a terceira galega, pero como digo, o resto do equipo ten un nivel óptimo para afrontar o ascenso con garantias, sempre e cando teñamos alguén que os dirixa con sabedoria, iso si, precisamos con urxencia un dianteiro de calidade, o Yuri ou o Igor que outros anos tivemos e do que este ano carecemos. Como dixen, Matias Saad non da a talla nin de puta coña, Iban Espadas fai o que pode pero ten as súas limitacións, e Gerardo ten toda a mña admiración, pero estivo lesionado e ten que coller ritmo outra vez, asi que, se hai cartos, agardemos alomenos unha fichaxe para o mercado de inverno.

Polo demais, eu estarei ao 100% có novo adestrador, agora mesmo imos novenos e a cinco puntos dos postos de liguilla, polo tanto estamos case na pomada, unicamente precisamos de compromiso e entrega, tanto de xogadores coma da afección, eu alomenos estarei alí para apoialos.

Foi un 16 de outubro de 1941, despois da fusión do Eiriña e mailo Alfonso, dous clubes da nosa cidade, cando naceu o Pontevedra Clube de Fútbol, o equipo da nosa cidade, o equipo que moitos e moitas granates levamos no corazón.  O seu partido de presentación foi cós nosos veciños de Vigo, despois veu a gloria da primeira división, alá pola década dos sesenta Pontevedra era un punto de atención importante en todo o Estado, xogábamos contra os mellores, recibíamos aos mellores e máis laureados clubes da liga española en Pasarón, o tempo do hai que roelo, o tempo no que o meu avó materno viña dende a pequena aldea de Sobradelo, en Vilagarcía de Arousa, a desfrutar con Cholo, Cerezuela, Martin Esperanza... aquel fantástico equipo.

Xamais esquecerei aquel ascenso contra o Lorca Deportiva na tempada 2003-2004, aquela vella bancada de norte ateigada de siareiros granates, aquel once de Javi Rodriguez, Padin, Tonino, Fede Bahón, Váquez, Capdevila ou Casablanca, aquel equipo comandado por Jose Luis Gay, lémbrome abrazado aos meus colegas e logo correndo pola herba ao remata-lo partido, aquel foi un dos dias máis marabillosos da miña vida, e como rematamos cantando no final da pasada tempada en Norte...

¡¡ Voltaremos a ser grandes, voltaremos outra vez !!!

http://www.lavozdegalicia.es/deportes/2009/09/18/0003_7978549.htm

Lémbrome daqueles concertos aos que tiven asistido aló polos anos 90 reclamando a selección galega, lembro aquela revista Bravú e aqueles cedés de grupos galegos de tódolos estilos pedindo o mesmo, unha selección galega de fútbol coa que poideramos desfrutar alomenos unha vez ao ano, lembro a Fran e a Nacho, a Siareiros Galegos, a Arsenio e máis a Vázquez e a min mesmo nas manifestacións reclamando iso, poder desfrutar de Galiza ou de Galicia, tanto nos ten, o feito era ter un equipo coas nosas cores e con xogadores da terra, que para iso temos unha boa canteira de rapaces xogando en tódalas ligas, e aló polo ano 2005 acadámolo.

Durou ben pouco... ou iso alomenos é o que contan os xornais, será a crise, ¿ou haberá algo máis detrás disto?.

Andan os foros granates un pouco alterados estes dias, o Pontevedra C.F. este ano fixo un equipo xeitoso e coido que imos estar na pomada para cando chegue a primaveira, esta ano fichouse con cabeza e con corazón, collendo xente experimentada na defensa, na media e na dianteira, xente da segunda e que incluso debutaron en primeira división, vamos, que un servidor pensa que esta ano non se nos escapa o arelado ascenso de categoria nin de puta coña, ou alomenos teño esa ilusión unha vez máis, que para iso a semana pasada fun a renova-lo meu abono de socio de fondo norte. Pero nunha das tantas discusións que hai no principal foro dos siareiros granates, un tema está a sobresair por riba dos demais, para mostra esta foto, inda que non o poderedes apreciar demasiado ben, explícovos polo miúdo o tema en cuestión:

Como apuntaba, supoño que non o poderedes apreciar con demasiada nitidez, pero neste novo escudo, que segundo entendo será somentes para membretes de cartas e demais papeleo do clube, a directiva tivo a ben incluir unha pequena franxa azul de esquerda a dereita por riba da cruz e da ponte, ¿significado?, pois nin máis nin menos cunha bandeira galega, si, o Pontevedra C.F. actualizouse e incluiu este xiro galeguista no seu emblema, asi como a bandeira que tamén lucirán os xogadores no pescozo das camisolas e o brazalete de capitán. Hai certa polémica en todo isto, algúns din que é política, outros que seguidismo doutros clubes ou de políticos que nos governan e supoño que das súas subvencións, eu particularmente coido que era algo que moitos agardábamos dende hai tempo, dende os tempos nos que o meu avó viña moitos domingos dende Sobradelo (Vilagarcía de Arousa) a animar ao clube granate, dende os tempos do Hai que roelo e da súa afección, que se achegaba dende calqueira punto da xeografia galega, xente ésta galegofalante e orgullosa de pertencer á afección dun dos clubes máis importantes de Galiza naqueles tempos e por suposto que tamén agora.

Vós sacade-las vosas conclusións, eu quero pensar que vai por todos aqueles homes e mulleres, polo meu avó que en paz descanse e por moitos coma el que paseaban con orgullo a súa condición de granates e de galegos.