A ponte vella

Ou se acaso, noite dos calacús.

Nin máis nin menos, deixádevos de asimilar tradicións foráneas que a televisión nos mete polos ollos, Coca-cola, McDonald's e demais empresas norte-americanas nos bombardean dia tras dia, tamén españolas coma Port-Aventura, supoño que ollaríades estes dias o spot televisivo de tengo mieeedo, en fin, sen comentarios.

Algún de vós se preguntará o porqué do festivo do dia 1 de novembro, inda que este ano cadre en domingo, para desgraza dos que traballamos, a explicación é moi sinxela. O 1 de novembro celébrase o dia de tódolos santos, e para os namorados da cultura céltica coma min, o Samain (Samahín en gaélico) , era ésta unha festividade pagana. A noite do 31 de Outubro é o fin de ano para os povos do arco céltico, entre eles Galiza, tamén é a festa en honra dos defuntos, marcando a transición do solsticio de outono ao de inverno. A festa do Samain era a máis importante do periodo pre-cristián, nesta data acendíanse lumes sagrados frotando pónlas de serbal e teixo, con elas quentábanse as lareiras  de tódalas casas, tamén era costume a de baleira-las cabazas (antes disto empregáronse nabos) para colocarlles dentro candeas que logo se colocaban nos cruces, nas portas das casas e en infinidade de lugares, esta tradizón inda se mantén viva no noso País na chamada "Noite dos calacús", noite da que teño participado algunha vez e da que vos recomendo tamén desfrutar, concretamente en Vilaboa, perto de Pontevedra, tedes unha festa dos calacús tódolos anos na taberna galega "A casa dos druidas",  hai anos, ao que chegara á festa cunha cabaza decorada regalábanlle unha consumición, esa noite xúntase moita xente a celebra-la noite de defuntos, hai música en vivo e queimada. Como vos comentaba antes, convén non trabucar a noite dos calacús ou celebración do Samahin celta, coa máis recente noite de Halloween que tanto se puxo de moda, sobre todo nas cidades, a noite de Halloween probablemente foi exportada aos EE.UU. polos emigrantes irlandeses entre finais do século XIX e principios do século XX, e na miña modesta opinión, é unha celebración máis que nada comercial, non hai máis que olla-lo bombo que lle dan firmas comercias como McDonald's.

O dito, na noite de defuntos non vos esquezades de poñer na fiestra do voso cuarto un calacú acendido e o dia de defuntos darvos un bo atracón de "osos de santo", que tamén hai que darlle unha alegria ao corpo e están boísimos.

[... Por primeira vez en toda a historia da autonomia, o Goberno Galego non so non está a defende-la nosa língua propia, senón que encabeza o ataque contra o seu emprego en diferentes ámbitos. O goberno presidido por Alberto Núñez Feijoo é o primeiro destes 30 anos de democracia que non respecta a obriga estatutaria de promover e potencia-lo uso da língua propia do País e garanti-lo seus usos oficiais. Todas e cada unha das medidas gobernamentais executadas ou anunciadas nestes meses no ámbito da língua, teñen ido dirixidas a anular medidas positivas para o noso idioma e dereitos lingüisticos que nos asisten ou frear proxectos destinados a tales fins. Algúns exemplos son o anuncio da derogación do decreto do 50% do ensino en galego (coa mal chamada consulta ás familias e todo o seu ronsel de irregulariedades), a supresión das axudas á traducción de libros para o noso idioma, ou a contrarreforma da Lei da Función Pública, so para que o galego non sexa igual de necesario que o castelán para acceder a un posto de traballo na administración galega. 

Manifestación o 18 de outubro ás 12:00 horas na alameda de Santiago de Compostela 

Por sorte existe na Galiza un amplo corpo social  que quero o galego e está disposto a responder na súa defensa. A esta base social que entende a nosa língua como algo de seu, heteroxénea na súa composición e mesmo na súa práctica habitual, é á que nos diriximos dende a Plataforma cidadá Queremos Galego: unha iniciativa conformada por entidades sociais de diversa tipoloxia e persoas a título particular, que nace coa vontade de ser o espazo común no que converxan as diferentes sensibilidades e colectivos cidadáns que defenden o galego ...]

Xa temos data para a manifestación antitaurina que comeza xa a ser unha tradición na nosa cidade, xusto no dia que comeza ese acto salvaxe e despreciable que algúns queren chamar noble arte del toreo, esta será a terceira edición dunha manifestación que ten coma obxectivo o de denunciar o maltrato animal encuberto coma festa nacional, que procura a concienciación da sociedade pontevedresa nun tema tan importante coma é éste, no que con cartos públicos, nomeadamente os da Deputación de Pontevedra do señor Louzán, apóiase esta barbarie que moitos rexeitamos de plano.

Seis son os puntos básicos que reclama a Coordenadora Antitouradas de Pontevedra, antigamente coñecida como a Plataforma Antitaurina de Pontevedra, pero que mudaron o seu nome con afán integrador e para dar cabida a máis colectivos e máis adhesións de particulares de dentro e fóra da nosa cidade, o que personalmente atopo coma un total acerto, posto que outros anos a Plataforma Antitaurina cecais estaba algo politizada de máis, sobre todo có tema da normativa AGAL nos cartazas e todo iso, a continuación déixovo-los seis puntos básicos que reclaman, nada máis, somentes comentar que A ponte vella  e mailo seu administrador súmanse ás numerosas adhesións de particulares e colectivos que están a ter os da Coordenadora Antitouradas estes dias, eu tamén estarei presente o dia 1 de agosto.

6 pontos básicos que reclamamos dende a Coordenadora Antitouradas de Pontevedra.

1) Cese inmediato de axudas encubertas ás touradas por parte de todas as institucións, nomeadamente da Deputación de Pontevedra, principal financiador público.

2) Instar á Xunta a aprobar unha Lei de Protección Animal que proíba as touradas e espectáculos onde se torture ou mate animais.

3) Declaración por parte do Concello de Pontevedra como “Cidade Antitouradas” e amiga dos animais.

4) Supresión das touradas como reclamo turístico por parte das Institucións públicas, así como dos programas de festas.

5) Erradicación do uso de espazos públicos para a promoción das touradas.

6) Reconversión da Praza de Touros nun Coliseu para espectáculos culturais e concertos.

Manifestación antitaurina en Pontevedra, 1 de agosto ás 19:00 horas diante da Peregrina.

Levan a nosa música e tamén a nosa cultura alá onde viaxan, son de seguro o grupo galego de música folc máis internacionalmente coñecido despois dos grandísimos Milladoiro e do gaiteiro Carlos Núñez, a formación comandado por Bieito Romero tocarán a noite do 17 de Agosto na praza da Ferreria de Pontevedra, cecais sexa casualidade ou non que toquen precisamente neste dia na nosa cidade, unha data tan importante para a memoria galega coma a que se conmemora hoxe, o dia dos mártires galegos, o aniversario da morte de Alexandre Bóveda, tendo en conta isto, que mellor homenaxe que a dun grupo galego.

Luar na Lubre levan unha chea de anos facendo da nosa música un produto de exportación, as súas melodias e tamén as súas letras engancharon a milleiros de afeccionados ao folc, aqui e en todo o mundo, teñen tocado nos máis importantes festivais de música celta do mundo, dende o galego Festival do Mundo Celta de Ortigueira ate o Intercéltico de Lorient na Bretaña (República de Francia). Eu tiven a oportunidade de coñecelos en persoa nunha viaxe que fixen hai anos ao Bierzo, nun festival no que eles tocaban antes de viaxar de novo cara ao Québec (Canadá), presentoumos unha amiga e botamos unha parrafada con Bieito Romero, Rosa Cedrón (a vocalista daquela) e o resto do grupo, logo tamén estiven en varias ocasións na súa taberna folc na Coruña, que dicir deles, sobre todo do gaiteiro Bieito Romero, un tipo xenial, un galego dos pes á cabeza, orgulloso de leva-la nosa cultura e o nome do noso País polo mundo adiante.

Dende este recuncho de A ponte vella, recoméndovo-lo concerto encarecidamente, Luar na Lubre son de seguro hoxendia, o mellor directo que podedes ollar dun grupo galego de folc, todo un espectáculo para a vista e os sentidos, unha aposta moi atinada por parte do Concello de Pontevedra a súa contratación, de seguro que non defaudará a ninguén, presentarannos o seu último disco Camiños da fin da terra, déixovos có meu tema preferido Chove en Santiago, na voz da súa anterior vocalista, Rosa Cedrón.

De cachondeo ou tomadura de pelo podería definir o último anuncio dos traballadores de Cespa, os cales de seguro coñeceredes por películas como Tocándole los huevos a Pontevedra ou Los más chulos del barrio somos nosotros. Pois iso, achégase un verán máis e como cada dous anos -coincidindo exactamente coas negociacións do seu convenio laboral- os ínclitos empregados da concesionaria da recollida do lixo na nosa bendita cidade veñen coas súas xustas ou inxustas, non saberia definilo, reclamacións laborais, pero como xa dixen, cada dous veráns os maiores perxudicados somos nós, os cidadáns de a pe, os que paseamos, traballamos ou pasámolo rato polas rúas da nosa cidade, unha vez máis e non sei cantas irán, un conflicto laboral entre unha empresa privada e mailos seus privados traballadores salpica ao resto dos mortais que non temos culpa de nada e pagámolos nosos impostos, incluida a taxa pola recollida do lixo, facede algo de memoria e lembrade aquel "problema" que tivemos coa concesionaria do servizo de guindastre de Pontevedra, aquelas semanas nas que a nosa cidade ficou inmersa nunha "anarquía automobilística" total.

Persoalmente coido que o Concello non debería inmiscuirse nos conflictos laborais dunha empresa privada, e máis cando ano tras ano nos toman o pelo desta maneira, pero isto xa comeza a ser unha chantaxe en toda regla á cidadanía, agardando precisamente ás festas da Peregrina, o intre no que chegan á nosa cidade miles de visitantes e os pontevedreses queremos desfrutar das nosas rúas e prazas. Coido que Raimundo González, na medida do posible, deberia facer un pouco de forza e presionar a Cespa para que resolva o conflicto cós seus traballadores e asi acada-la desconvocatoria da folga prevista, xogámonos moito nelo

A seguinte información achégama Maruxa, amiga e responsable local de Galiza Nova en Poio. Coméntame que o vindeiro dia 5 de xullo, a organización das mocidades do B.N.G. ten preparada unha xornada lúdico-formativa e de convivencia no concello de A Lama, na que ademais de algunha charla formativa a cargo de persoeiros do partido, como Rubén Cela, Iria Aboi ou Francisco Rodriguez, -o que fora deputado nas Cortes polo Bloque Nacionalista Galego-, haberá un xantar de confraternización entre tódolos militantes e simpatizantes nacionalistas e logo un atractivo roteiro polos arredores de A Lama. A xornada terá lugar ao longo de todo o dia, e como a seguridade é unha das súas preocupacións, haberá buses dende Pontevedra e Poio para trasladar á xente ate A Lama, persoalmente considéroo todo un acerto, posto que como vedes todos son facilidades para non ter que colle-lo coche e poder desfrutar do xantar e do posterior paseo sen preocuparse polo transporte.

O interesados poderán inscribirse pasando pola sede do B.N.G. de Pontevedra ou ben chamando ao seu teléfono, tamén no enderezo electrónico gznova_poio@yahoo.es , tedes de prazo para facelo toda esta semana. Por último, comentarvos que tanto o transporte coma o xantar son de balde, sairán autobuses dende Valga, Pontecaldelas, Barro, Caldas de Reis, Poio, por citar algunha das vilas da bisbarra, por suposto tamén dende Pontevedra, polo tanto é unha boa oportunidade para desfrutar dun dia de lecer polos arredores da Lama, non deixedes pasa-la ocasión de desfrutar da natureza en tan fermoso sitio.

Nota á marxe: Estiven botándolle unha ollada á web municipal e somentes podo dicir que é do máis cutre sinxelo que pode haber, que se poñan as pilas ou ben a xente do Concello de A Lama (Partido Popular) ou ben a xente de Integal S.L. -que polo que semella son os creadores da web-, porque a maioria das seccións se atopan sen actualizar e hoxendia unha web en condicións é unha das mellores tarxetas de presentación para calqueira empresa ou organismo, por suposto tamén para un concello.

O músico e compositor arxentino Andrés Calamaro ven de anunciar hai uns dias as datas dos seus dous primeiros concertos deste verán, un deles terá lugar o vindeiro 7 de xuño no Recinto feiral de Pontevedra. O que fora integrante do mítico grupo Los Rodriguez e considerado unha das máis grandes figuras que deu o rock arxentino visitará a nosa cidade dentro do seu La lengua popular Tour.

Por fin semella que a capital da provincia comeza a entrar no circuito dos grandes concertos nacionais, polo de agora Andrés Calamaro somentes facilitou dúas das datas dos seus concertos, unha é a de Pontevedra e a outra a de Burjassot (Valencia), asi que xa comezamos a estar ao nivel de grandes cidades. Contan por ahí, que moitos representantes de artistas comezaron a apunta-lo nome de Pontevedra despois do exitoso concerto de Miguel Bosé o verán pasado, evento éste que congregara a máis de 30.000 persoas e que tivo unha grande repercusión nos medios.

O dito, non vos esquezades da data, 7/06/2008 ás 20:30 horas no Recinto Feiral de Pontevedra (23 €).

Hai cousa dunhas semanas xa falara deste monologuista galego no meu blogue, daquela foi para comentarvos que gañara o programa da T.V.E. chamado "El rey de la comedia", desta volta é para anunciarvos que este sábado pola noite (26/01/08)  vai actuar en Pontevedra, será no local da "Sociedade deportiva-cultural de Mourente" ás 22:30 horas, os prezos para velo serán de 5 euros (os socios) e de 8 euros (os non socios) as entradas están á venda na cafeteria da propia S.C.D. de Mourente e tamén na cafeteria "Tertulia" da rúa Echegaray, o prezo o mesmo dia da actuación será de 10 euros.

Rober Bodegas leva xa cinco anos actuando de monologuista e tamén colabourando en Radio Voz Bergantiños contando á actualidade dunha maneira "desenfadada", eu teño visto varios dos monólogos deste carballés e penso que paga a pena velo en directo, xa merquei as entradas, asi que o sábado dia 26 estarei ali presente para poder botar unhas gargalladas coas súas historias, xa estaba agardando que viñera pola nosa cidade para poder desfrutar dun monólogo seu en directo, para ir abrindo boca e por se algún de vós inda non o coñece e quere saber o que se pode atopar, déixovos aqui un dos seus monólogos máis vistos en youtube, que o desfrutedes.

Editado: Por certo, aqui tedes unha foto que saquei con Rober Bodegas despois do monólogo, un tio fenomal Rober.

No dia de hoxe, vaise celebrar ás 19:30 horas e na Praza da Peregrina da nosa cidade, unha concentración de rexeitamento á agresión neo-nazi que tivo lugar o pasado fin de semana en Madrid, na que un rapaz anti-feixista de dezaseis anos foi asasinado no metro de Madrid  por parte dun xove neonazi, o agresor formaba parte dun grupo que acudia a unha manifestación organizada por "Democracia Nacional" baixo 0 lema "Contra el racismo anti-español y contra la inmigración", o rapaz morto vivia no barrio obreiro de Vallecas e recibiu unha puñada mortal nun vagón do metro madrileño cando acodia xunto con outros compañeiros á contra-manifestación.

Sirvan estas letras para lembrar a Carlos Javier Palomino, un rapaz inxustamente asasinado por defende-las súas ideas e para darlle tamén todo o meu apoio á xente de Vallecas, cós que  tiven a oportunidade de compartir unha tarde de cervexas e fútbol o ano pasado, con motivo do Rayo Vallecano-Pontevedra C.F. Tamén facer un chamamento para pedi-la ilegalización de partidos feixistas e falanxistas coma "Democracia Nacional", se ilegalizan a Batasuna ou Euskal Herritarrolk por apoloxia da violencia, tamén teñen que facer o mesmo con esta xente.

Antinazis mandan !!

Buscando pola rede novas encol do tema da "Feira Franca 2007" atopei esta noticia, a xente de "Tuata dé Danann", un clube de rol de Pontevedra, vai organizar para a fin de semana da Feira Franca un xogo de rol en vivo nas rúas da nosa cidade, é a segunda edición e convidan a todo aquel que se queira divertir e desfrutar da festa dunha forma máis participativa, calqueira se pode apuntar, a participación é de balde e o único requisito é vir vestido de época, medieval se entende, claro, tedes máis información na súa web, por certo, a música de fondo que teñen na páxina está moi ben.

A partires de hoxe comezará o prato forte das festas do verán no veciño concello de Poio, a "Festa do Mar" é o principal reclamo, hai dias xa foi o encontro de embarcacións tradicionais e hoxe será a apertura da carpa gastronomica, os concertos serán de balde ao longo deste xoves, venres e sábado, a partires das doce da noite e na explanada do porto deportivo de Combarro, tamén haberá pasarrúas, o encontro de pintores luso-galaicos  e un concerto de bandas de gaitas, se queredes máis información pasádevos por aqui, a web do Concello de Poio.

A Fundación Alexandre Bóveda organiza para o vindeiro 17 de agosto diversos actos con motivo da celebración do Día da Galiza Mártir.

Ás 13.00 horas terá lugar na Caeira, en Poio, a homenaxe institucional a Alexandre Bóveda, diante do monumento erixido na memoria deste intelectual galeguista asasinado polos sublevados franquistas. Intervirán neste acto o vicepresidente do Governo, Anxo Quintana; o alcalde de Poio, Luciano Sobral, e o presidente da Fundación Alexandre Bóveda, Fernando Quintela.

Ás 14.00 horas comezará o xantar de entrega do II Premio 'Día da Galiza Mártir á recuperación da memoria histórica ao historiador Dionisio Pereira, no Pazo da Cultura de Pontevedra. Participarán neste encontro a conselleira de Cultura, Ánxela Bugallo e Xoán Carlos Garrido, da Fundación Alexandre Bóveda, ademais do propio investigador galardoado.

Ás 18.30 desenvolverase unha cerimonia de aniversario na capela de San Mauro, Pontevedra. E ás 19.00 horas un acto cívico diante do sartego de Bóveda, no cemiterio de San Mauro. Asistirán o vicepresidente da Fundación organizadora e fillo de Alexandre Bóveda Xosé Luís Bóveda e a escritora Fina Casalderrey.

Ás 20.30 horas chegará a homenaxe política, diante do monumento a Alexandre Bóveda situado na praza de Curros Enríquez de Pontevedra, co senador do BNG Francisco Jorquera.